គណៈកម្មការវត្តចន្ទប្បជោត្តនារាម ប្រកាសបញ្ឈប់រាល់ការជួបជុំទ្រង់ទ្រាយធំ និងផ្អាកមកក្រាបថ្វាយបង្គំ សុំនិមន្តព្រះធម្មវនវាសី ចន្ទមុនី ទៅតាមបណ្ដារាជធានី-ខេត្ត
កំពង់ឆ្នាំង៖ នៅថ្ងៃទី២៣ ខែធ្នូ ឆ្នាំ២០២៣ យោងតាមលិខិតរបស់ វត្តចន្ទប្បជោត្តនារាម បានចេញសេចក្ដីជូនដំណឹង ស្ដីពីការផ្អាកមកក្រាបថ្វាយបង្គំ និងសុំនិមន្តព្រះធម្មវនវាសី ចន្ទមុនី ទៅតាមបណ្ដារាជធានី-ខេត្ត។ ការប្រកាសនេះធ្វើឡើងក្រោយសម្តេចធិបតី ហ៊ុន ម៉ាណែត ណែនាំរដ្ឋមន្ត្រីក្រសួងធម្មការ និងសាសនា ឱ្យពិនិត្យលើការប្រណិប័តន៍ផ្នែកជំនឿ និងសាសនានៅកម្ពុជា។
គណៈកម្មការ វត្តចន្ទប្បជោត្តនារាម សូមជម្រាបជូនថា៖ ចាប់តាំងពីថ្ងៃទី២២ ខែកញ្ញា ឆ្នាំ២០២៣ កន្លងមកប្រជាបរិស័ទមានការភ្ញាក់ផ្អើលនាំគ្នា មកគោរពក្រាបថ្វាយបង្គំ និង សុំនិមន្តព្រះធម្មវន វាសី ចន្ទមុនី ព្រះចៅអធិការវត្តចន្ទប្បជោត្តនារាម មានចំនួនច្រើនកើនឡើងមិនដាច់ រហូតមកដល់សព្វថ្ងៃនេះ មានរយៈពេល ៤ខែ ទន្ទឹមនឹងការភ្ញាក់ផ្អើលនេះផងដែរ ការគោរពប្រតិបត្តិរបស់បរិស័ទខ្លះត្រឹមត្រូវល្អ តាមរបៀបប្រពៃណី សាសនា ហើយបរិស័ទខ្លះទៀត មានភាពមិនសមរម្យ បង្កឲ្យមានភាពអសណ្ដាប់ធ្នាប់ នៅក្នុងវត្តអារាម ក៏ដូចជាតាមបណ្តា រាជធានីខេត្ត និងទីកន្លែងផ្សេងៗ ដែលព្រះអង្គគ្រូបាននិមន្តទៅដល់ ក្នុងលក្ខណៈរូបភាពប្រជែតប្រជែងគ្នាចង់ជួប ចង់ឃើញ ព្រះអង្គគ្រូ មិនថាពេលយប់ ឬពេលថ្ងៃដែលបង្កឲ្យទៅជាផលរំខានដល់ព្រះអង្គ មិនមានពេលគ្រប់គ្រាន់ក្នុងការសម្រាកព្រះកាយ ជាពិសេសក្នុងការបដិបត្តិរបស់ព្រះអង្គដែលជាអ្នកមានអធ្យាស្រ័យក្នុងការរស់នៅស្ងប់ស្ងាត់ មិនច្របូកច្របល់ដោយពួកគណៈ ប៉ុន្តែដោយឡែក រយៈពេល ៤ខែកន្លងមកនេះ ព្រោះតែទឹកព្រះទ័យ អាណិតមេត្តាដល់បរិស័ទទើបព្រះអង្គបន្តជួប ដោយមិនគិតអំពីភាពនឿយហត់របស់ខ្លួនព្រះអង្គផ្ទាល់ឡើយ។
ដោយអាស្រ័យការបារម្ភពីព្រះសុខភាព និងព្រះកាយពលរបស់ព្រះអង្គគ្រូ អំពីសំណាក់ព្រះសង្ឃ អាចារ្យ គណៈកម្មការវត្តយើងខ្ញុំ មិនអាចបណ្តែតបណ្តោយឲ្យសភាពរបស់បរិស័ទ ចេះតែបន្ត ក្នុងរូបភាពបែបនេះតទៅទៀតបាន យើងខ្ញុំព្រះ ករុណាអាត្មាភាពជាព្រះសង្ឃ អាចារ្យ គណៈកម្មការវត្តចន្ទប្បជោត្តនារាម សូមសម្រេច រំសាយនូវរាល់ការជួបជុំធំៗ តាមបណ្តារាជធានីខេត្ត វត្តអារាម ដែលបាននិមន្តព្រះអង្គបូករួមទាំងនៅក្នុងវត្ត ចន្ទប្បជោត្តនារាម ផ្ទាល់ផង ដែលមានមនុស្សចូលរួមច្រើន រហូតគ្រប់គ្រងសណ្តាប់ធ្នាប់ អនាម័យ និងផាកសុខភាព សុវត្ថិភាព ជូនដល់ប្រជាពលរដ្ឋមិនបានល្អ បង្កឲ្យមានរូបភាពមិនល្អនៅក្នុងសង្គម ។
អាស្រ័យហេតុនេះ គណៈគ្រប់គ្រងវត្តចន្ទប្បជោត្តនារាម សូមនិរាករណ៍នូវរាល់លិខិតនិមន្ត និងការនិមន្ត ក្នុងលក្ខណៈ មហាជនដែលបានឯកភាព និងមិនទាន់បានឯកភាពទាំងអស់ ចាប់តាំងពីថ្ងៃជូនដំណឹងនេះតទៅ ដើម្បីធានាបាន នូវសណ្តាប់ធ្នាប់ និងអនាម័យជូនដល់ប្រជាពុទ្ធបរិស័ទទាំងអស់ ក៏ដូចជា មានពេលទុកឲ្យព្រះអង្គគ្រូ បានសម្រាក និងបដិបត្តិ តាមរបៀបអធ្យាស្រ័យរបស់ព្រះអង្គ តាមធម្មតាវិញ ៕
តាមដានព័ត៌មាន៖ https://t.me/Khmersbasaknews
សម្រាប់ការផ្តល់ព័ត៌មានទូទៅ៖ https://t.me/Khmerbasaknewstv24h
