កម្លាំងនគរបាលនៃរបបអាណានិគមវៀតណាមបានចាប់ និងឃុំឃាំងខ្លួនជាបណ្ដោះអាសន្ន ព្រះតេជព្រះគុណ ថាច់ ចន្ទតារា (Thạch Chanh Đa Ra) ជាព្រះចៅអធិការវត្ត និងបរិស័ទវត្តទ្រនំសេក នាខេត្តលង់ហោរ ២រូបទៀត គឺ លោក គឹម ឃីម (Kim Khiêm) និង លោក ថាច់ វាសនា (Thạch Ve Sanal) ពីបទ “កេងចំណេញលើសិទ្ធិសេរីភាព និងលទ្ធិប្រជាធិបតេយ្យ” នាវេលាម៉ោង៣រសៀល ថ្ងៃទី២៦ ខែមីនា ឆ្នាំ២០២៤ ដោយមន្ទីរនគរបាលសន្តិសុខ និងស៊ើបអង្កេត ខេត្តលង់ហោ នៃរបបអាណានិគមវៀតណាម ចោទពីបទថា ព្រះសង្ឃ និងពលរដ្ឋខ្មែរក្រោមខាងលើ បានបំពានលើអ្វីដែលរបបវៀតណាមហៅថា កេងចំណេញសេរីភាព លទ្ធិប្រជាធិបតេយ្យ បំពានលើផលប្រយោជន៍របស់រដ្ឋ សិទ្ធនៃផលប្រយោជន៍ស្របច្បាប់ នៃអង្គការចាត់តាំង និងឯកជនតាមមាត្រា៣៣១ នៃច្បាប់ក្រមព្រហ្មទណ្ឌ របស់ប្រទេសវៀតណាម។
បណ្តាញទំនាក់ទំនងសង្គមវៀតណាមបានបង្ហោះព្រោងព្រាតជាសាធារណៈ បន្ទាប់ពីព្រះសង្ឃវត្តទ្រនំសេកប្រកាសបាត់ព្រះកាយព្រះចៅអធិការវត្តប៉ុន្មានម៉ោង។
សូមបញ្ជាក់ថា ព្រះតេជព្រះគុណ ថាច់ ចន្ទតារា និងពលរដ្ឋខ្មែរក្រោម ២រូបនេះ ជាអ្នកសកម្មក្នុងការចូលរួមសកម្មភាពតស៊ូមតិ ដើម្បីលើកកម្ពស់ការអនុវត្តសិទ្ធិជាមូលដ្ឋានរបស់ជនជាតិដើមខ្មែរក្រោមនៅដែនដីកម្ពុជាក្រោម ។
សូមរំលឹកថា៖ ប្រភពព័ត៌មានពីព្រះសង្ឃក្នុងវត្តទ្រនំសេក នាខេត្តលង់ហោរ បានឲ្យដឹងថា ព្រះតេជព្រះគុណ ថាច់ ចន្ទតារា ជាព្រះចៅអធិការវត្ត និង លោក គឹម ឃីម ជាគ្រូអាចារ្យ បានបាត់ ខ្លួន អស់ ជាច្រើន ម៉ោងមកហើយ នៅថ្ងៃទី ២៦ ខែមីនា ។ ការបាត់ខ្លួននេះ នៅពេលដែលព្រះតេជព្រះគុណ ថាច់ ចន្ទតារា និង លោក គឹម ឃីម ធ្វើដំណើរចេញពីសាលាឆទានភូមិកន្រែង ឆ្ពោះមកកាន់វត្តទ្រនុំសេក ដែល ស្ថិត នៅ ចម្ងាយ ប្រមាណជាង ១០គីឡូម៉ែត្រ ។
តាមប្រភពដដែលអះអាងថា នៅពេលនោះអាជ្ញាធរយួនកំពុងធ្វើសកម្មភាព ចល័ត ចុះឡើងជុំវិញបរិវេណវត្តទ្រនុំសេក និងសាលាឆទានភូមិកន្រែងផងដែរ ក៏បានធ្វើការឃាត់ខ្លួន ព្រះសង្ឃ និងពលរដ្ឋខ្មែរក្រោមទាំង៣អង្គនាក់នោះតែម្តង។ មិនតែប៉ុណ្ណោះ អាជ្ញាធរនៃរបបអាណានិគមវៀតណាមបានដកហូតភាពជាអ្នកបួសរបស់សកម្មជនសង្ឃខ្មែរក្រោម ព្រះតេជព្រះគុណ គឹម សំរិន្ទ និងហាមវត្តទាំង ១៤៣ ក្នុងខេត្តព្រះត្រពាំងមិនឱ្យទទួលព្រះអង្គគង់នៅ។
នៅពេលឃើញរបបអាណានិគមវៀតណាមនៅតែបន្តជិះជាន់ខ្មែរក្រោមជាបន្តបន្ទាប់ ក្នុងនោះព្រមទាំងតុលាការវៀតណាម បានប្រកាសផ្ទន្ទាទោសសកម្មជនខ្មែរក្រោមចំនួន៤រូប ឲ្យជាប់ពន្ធធានាគារ សហព័ន្ធខ្មែរកម្ពុជាក្រោមបានកំពុងធ្វើការតស៊ូមតិលើឆាកអន្តរជាតិ និងធ្វើបាតកម្មនៅមុខស្ថានទូតវៀតណាមនៅទូទាំងពិភពលោកជាបន្តបន្ទាប់ ដើម្បីបញ្ឈប់នូវការជិះជាន់ពីរបបអាណានិគមវៀតណាមមកលើជនជាតិដើមខ្មែរក្រោម។
ពាក់ព័ន្ធនឹងព័ត៌មាននៃការចាប់ខ្លួនព្រះសង្ឃ និងពលរដ្ឋខ្មែរក្រោមនេះ ដោយសារព័ត៌ខ្មែរបាសាក់បានធ្វើការដកស្រង់ពី បណ្តាញផ្សព្វផ្សាយវៀតណាម និងខ្មែរក្រោម ព្រមទាំងសារព័ត៌មាន សម្លេងកម្ពុជាក្រោម ហៅការថា VOKK ៕
សួមទស្សនាការរាយការណ៍ជាវីឌីអូ ខាងក្រោមៈ
